220 مليون دولار لدول حوض النيل وإفريقيا.. بس مصر بتقدم الدعم ده إزاي؟ وإيه المشروعات اللي بتتعمل بالمبالغ دي؟
مصر بتدعم دول حوض النيل بمشروعات تنموية في قطاع المياه، من حفر الآبار وإنشاء محطات مياه جوفية بالطاقة الشمسية، لخزانات تجميع مياه الأمطار والمراسي النهرية ومراكز التنبؤ بالفيضانات.
ومشروعات التعاون دي مش بس بنية تحتية.. فيه كمان تدريب للكوادر الإفريقية، وصل لنحو 1650 متدرب، علشان الدول دي تقدر تطور قدراتها في إدارة الموارد المائية ومواجهة تحديات المناخ.
لكن الرقم الأهم إن مصر أطلقت كمان آلية تمويل مبدئية بـ100 مليون دولار لدراسة وتنفيذ مشروعات تنموية في دول حوض النيل، حسب أولويات كل دولة.
وفي ملف تاني، مصر وافقت على دعم جهود توفير التمويل لـ36 مشروعًا في حوض النيل الجنوبي، بتشمل الطاقة الكهرومائية والربط الكهربائي وإمدادات المياه ومشروعات متعددة الأغراض.
يعني الدعم مش فلوس وبس.. لكنه مشروعات وخبرات وتعاون في ملفات المياه والطاقة والتنمية.
والسؤال هنا: إزاي المشروعات دي ممكن تحقق مصالح مشتركة لمصر ودول حوض النيل؟
التعليقات