عاجل: مليون مستثمر جديد في الطريق.. إزاي تعزز البورصة فرص نمو الشركات والطروحات؟

القيد في البورصة مش مجرد خطوة لبيع أسهم الشركة، لكنه ممكن يغير شكلها بالكامل ويزود فرص نموها.

عمر رضوان، رئيس البورصة المصرية، أكد إن طرح الشركات في البورصة بيساعد على الفصل بين الملكية والإدارة، وده بيدي فرصة للاستعانة بكفاءات إدارية متخصصة، سواء الشركة عائلية أو خاصة أو حكومية.

كمان وجود عدد كبير من المستثمرين بيزود السيولة على الأسهم، وبيخلي تحديد القيمة العادلة للشركة أسهل، بعكس الشركات غير المقيدة اللي بيكون تقييمها أصعب بسبب ضعف السيولة.

والميزة كمان أن المستثمر يقدر يبيع أسهمه بسهولة وسرعة من خلال التطبيقات الإلكترونية.

البورصة كمان بتوسع أدواتها، من خلال تطوير المشتقات المالية والشراء الهامشي والاقتراض بغرض البيع، بجانب تنشيط سوق السندات وأذون الخزانة.

والأهم أن عدد المستثمرين الجدد وصل لأرقام كبيرة، ومتوقع يتجاوز المليون خلال 2025 و2026، بالتزامن مع ارتفاع متوسط التداول اليومي لحوالي 10 مليارات جنيه.