مش مجرد مصنع إطارات.. سايلون الصينية بتكبر رهانها على مصر بشكل ضخم.
الشركة قررت تضخ استثمارات جديدة بحوالي 1.14 مليار دولار لتوسيع إنتاج الإطارات في مصر، وبكده إجمالي استثماراتها المعلنة في مشروعاتها هنا يوصل لحوالي 1.7 مليار دولار.
والأضخم إن التوسعة الجديدة لوحدها هتضيف طاقة إنتاجية تصل لـ27 مليون إطار سيارات سنويًا، بجانب 1.65 مليون إطار للشاحنات والأتوبيسات، و20 ألف طن من إطارات المعدات.
وبعد اكتمال كل المشروعات، سايلون مستهدفة توصل بإنتاجها في مصر لحوالي 39.3 مليون إطار سنويًا!
يعني مصر مش بس هتكون سوق لمنتجات سايلون.. السخنة بتتحول لقاعدة تصنيع وتصدير ضخمة تخدم أسواق في أفريقيا وأوروبا وأمريكا الشمالية.
والشركة اختارت مصر بسبب موقعها وقربها من الموانئ وقناة السويس، وده بيساعدها في تصدير الإنتاج وتقليل تكاليف النقل وسرعة الوصول للأسواق العالمية.
التعليقات