مصر حاطة هدف كبير قدام الصناعة خلال السنين الجاية.. وهو أن الصادرات تقفز من حوالي 48 مليار دولار دلوقتي لـ100 مليار دولار بحلول 2030.
وزير الصناعة خالد هاشم وضح أن الوصول للرقم ده محتاج شغل على أكتر من محور، أهمها زيادة التصنيع المحلي، وتطوير الصناعات المغذية، وتحويل الخامات لمنتجات جاهزة تحقق قيمة اقتصادية أكبر بدل تصديرها في صورتها الأولية.
والوزارة كمان بتجهز لطرح مصانع ومجمعات صناعية جديدة قدام المستثمرين، مع تقليل الإجراءات الإدارية وتسريع دخول المشروعات مرحلة الإنتاج.
وفي خطوة لدعم المنتج المحلي، الوزارة بتستهدف إعادة تفعيل قانون تفضيل المنتج المصري، مع التأكيد أن الأراضي الصناعية لازم تتحول لمشروعات شغالة، والأراضي غير المستغلة ممكن تتسحب من أصحابها غير الملتزمين.
الخطة كمان بتركز على تدريب العمالة وتطوير مهاراتها، والاستفادة من موقع مصر وقناة السويس والموانئ في فتح أسواق جديدة.
لكن التحدي الحقيقي هو تحويل المستهدفات لإنتاج فعلي وصادرات تنافس عالميًا، وسط اضطرابات التجارة وسلاسل الإمداد.
التعليقات