الدولار رجع يضرب من جديد ووصل لمستويات فوق الـ54 جنيه.. طب إيه اللي بيحصل في سوق الصرف؟ وليه المستثمرين الأجانب بيسحبوا مليارات الدولارات من مصر رغم إن الاحتياطي النقدي بيحقق أرقام قياسية وتحويلات المصريين بالخارج بتزيد؟ وهل خروج الأموال دي ممكن يضغط على الجنيه أكتر الفترة الجاية؟
اللي حصل إن الدولار رجع يسجل مكاسب جديدة في البنوك المصرية بعد تراجع مؤقت.. وسعره عدى مستوى الـ54 جنيه في عدد من البنوك.
أعلى سعر اتسجل كان في بنك سايب عند 54 جنيه و63 قرش للبيع.. بينما البنك المركزي سجل 54 جنيه و47 قرش للبيع.. وده معناه إن سوق الصرف لسه بيتأثر بحركة الأموال الداخلة والخارجة من مصر.
السبب الأهم اللي تحت المراقبة دلوقتي هو خروج الأموال الساخنة.. ودي استثمارات أجنبية بتدخل أدوات الدين المصرية زي أذون وسندات الخزانة للاستفادة من العائد.. لكنها ممكن تخرج بسرعة لما المستثمرين يغيروا حساباتهم أو يلاقوا فرص تانية.
خلال 3 أيام بس.. تخارجات المستثمرين العرب والأجانب من السوق الثانوية للدين الحكومي وصلت لـ1.13 مليار دولار.. وده بعد ما كانوا ضخوا استثمارات جديدة خلال الأسبوعين اللي فاتوا.
لكن في المقابل فيه نقطة مهمة.. احتياطي النقد الأجنبي المصري وصل لمستوى قياسي عند 57.35 مليار دولار في سبتمبر.. وتحويلات المصريين بالخارج زادت بنسبة 27.2% خلال أول 8 شهور من 2026 ووصلت لنحو 33.9 مليار دولار.
يعني الصورة مش كلها ضغط على الجنيه.. لأن فيه مصادر دولارية بتتحسن بالفعل.. لكن خروج الأموال الساخنة ممكن يعمل ضغط على سوق الصرف في المدى القصير.. خصوصًا لو استمر بنفس الوتيرة.
التعليقات