لو محتاج تطلع وثيقة أحوال مدنية، مش لازم تروح السجل المدني وتقف في طوابير، لأن وزارة الداخلية بتوفر عدد من الخدمات إلكترونيًا، وتقدر تطلب الوثيقة أون لاين وتوصلك لحد البيت.
الخدمات دي بتشمل بطاقة الرقم القومي، وشهادات الميلاد والوفاة، وقسائم الزواج والطلاق، وكمان القيد الفردي والقيد العائلي.
كل اللي عليك تدخل على بوابة وزارة الداخلية أو تستخدم تطبيق قطاع الأحوال المدنية، وتسجل دخولك أو تعمل حساب جديد، وبعدها تختار نوع الوثيقة وتدخل بياناتك بدقة.
ولو الوثيقة تخص حد من الأسرة، لازم تتأكد من بيانات وصلة القرابة، وبعد كده تختار طريقة الدفع الإلكتروني، وتكتب عنوان الاستلام بالتفصيل.
بس خد بالك، لازم البيانات تكون مطابقة للسجلات الرسمية، وكمان الوثيقة تكون سبق إصدارها ورقيًا، عشان تقدر تطلب إعادة إصدارها إلكترونيًا. وفي النهاية، الوثيقة بتوصلك على العنوان المحدد عن طريق البريد.
التعليقات