وداعا لقطار أبو قير.. الإسكندرية بتستعد لمرحلة جديدة في المواصلات، مع اقتراب تشغيل أول مترو كهربائي في تاريخ المدينة خلال 2027، بمشروع هيغير شكل التنقل بين شرق الإسكندرية ووسطها
المشروع بيمتد بطول حوالي 22 كيلومتر، من محطة أبو قير لحد محطة مصر، وبيضم 20 محطة، منها 6 محطات سطحية و14 محطة علوية.
لكن التغيير مش مجرد استبدال قطار بمترو.. إحنا بنتكلم عن سرعة تشغيل هتصل لـ100 كيلومتر في الساعة، بدل حوالي 25 كيلومتر للقطار القديم، وزمن رحلة مستهدف ينخفض من 50 دقيقة إلى 25 دقيقة بس
وكمان الفاصل بين القطارات مستهدف يوصل لدقيقتين ونص بدل 10 دقايق، مع طاقة استيعابية تصل إلى 60 ألف راكب في الساعة لكل اتجاه، وده ممكن يخفف الضغط على الطرق ووسائل النقل التقليدية في واحدة من أكثر المدن ازدحامًا في مصر.
والمرحلة الأولى هتشتغل بـ21 قطارًا بإجمالي 189 عربة، بتصنعها الشركة الوطنية المصرية لصناعات السكك الحديدية «نيرك»، في خطوة لدعم التصنيع المحلي.
والأهم إن المشروع مش هيقف عند أبو قير ومحطة مصر؛ لأن الخطة المستقبلية بتستهدف مد الخط غربًا ناحية الكيلو 21 على طريق الإسكندرية–مطروح، وبعدها الوصول لمطار برج العرب.
التشغيل التجريبي مستهدف خلال أبريل أو مايو 2027، وبعدها تبدأ مرحلة جديدة في تطوير النقل الجماعي بالإسكندرية.
التعليقات